Descripción

Itinerariu: San Xuan de Beleño - Ventaniella - La Uña - Fonfría - Arcenoriu - Les Bedules - Peloño - San Xuan de Beleño.

Dificultá: Alta

Descripción del percorríu:

Esta ruta, l'aniciamos nel Conceyu de Ponga, asina que sacamos billete d'autobús, pa dir hasta San Xuan de Beleño, que ta a unos 28 Km de Cangas d'Onís.

En San Xuan de Beleño, y trevesando'l pueblu nos diriximos en direición a Sobrefoz. Hai que coyer agua, que la ruta va ser un pelín dura. Nun entramos nel pueblu, enantes, coyemos una pista que sube pela izquierda. Per ella aportamos a la vega de Ventaniella,(llevamos 12 km.) onde alcontramos una ermita y dalgunes cabanes. Equí hai una venta perguapa, y fói una pena nun poder quedase, pues estaba una neña de Sofrefoz faciendo unes fabes con xabalí que golían de.........Hai que colar y dexalo pa otru día. Ya llevamos 11 kilómetros de ruta.

Subimos pela ladera de la izquierda pa llegar al puertu de Ventaniella (14270 m.). Esta subida ye mui pindia, tien munches piedres y va facese dalgún tramu a pinrrel. Nun ye muncho, conté unos 2 Km. Esti puertu contó al menos desde la edad media con ún camín carreteru, pel cual pasaron cristianos, musulmanes, arrieros y agora vaquieros

Ya nel puertu, trevesamos el colláu y baxamos per un camín estrechu, hai que facer dalgún equilibriu pa nun llevar una gochá y de xemes en cuando hai qu'apease de la bici. Pronto aportamos a la vega de Valdosín, onde llega una pista.(Equí hai unes ruines de nun se qué). Atopámos una pista, y per ella vamos en direición de la carretera que sube'l puertu Tarna, pa dir al pueblu de La Uña.El cuenta marca agora 19 Km.

Dexamos el pueblu y per una pista que sale a la derecha, empobinamos al puertu de la Fonfría. Esta subida fái fríu pela pernera. Hai dos pinchazos (bueno, una parada nun bien mal). Nun voi a engañavos, hai que dar pedales a bondo. Per atrás vienes otros bicicleteros que quieren dexanos tiraos como cotones, pero salio-yos torda, pués el Poco a Poco, también tién aguilillas.
Coronamos y disfrutamos de la vega. Llevamos 26 kilómetros de travesía. Vamos agora en busca de la ermita del Arcenoriu, esti tramu ye agora mui duru, hai que seguir pela ladera de la derecha, ensín perder altura y baxar agora per un pedreru, pa cayer enrriba de la ermita del Arcenoriu.

Ya queden poques fuerces, asina que hai que parar a xintar el bocata. Hai varies cabanes y una fonte, asina que'l llugar ye l'ideal. (La semeya da idea d'ello).Tamos nel kilómetro 29 de ruta.
De nuevo en ruta trevesamos la vega en direicción oeste, buscando'l regatu Ruaquín, pa coyer una senda que ta medio escondía ente matorrales. Cruciamos el regatu y per un tramu que nun ye bicicleteru, aportamos a un colláu que nómase Guaranga, equí existen trincheres da cuando la guerra. Agora toca descensu a trevés del bosque de Peloño hasta'l colláu Granceno. Tamos nel kilómetru 38 de ruta. Vaya baxada,ye perguapa. Toca agora almirar la belleza del paixase y de la flora.

Pasamos el colláu Biforcadera, y seguimos pela pista de enmedio, la que ye mas clara,p'aportar al colláu y cabanes de Les Bedules. Kilómetru 42 de ruta.
Hai que parar p'agrupase, pues el descensu fízose rápidu y dalgunos quedáronse atrás, otru pinchó y hai que esperalos, pués tan paraos reparando la bici. Ya tamos tos de nuevo

Seguimos pela pista que güeyamos a la izquierda y que nos arima de nuevo a San Xuan de Beleño.La pista cambia y hai tramos de hormigón. Pronto atopamos la carretera Po-2. Miro'l cuenta y llevamos 43 kilómetros. La carretera ye mui afayaiza y descolgámonos como motos per ella. Ya vemos el bus aparcáu, lo cual diz qu'acabóse la ruta de nuevo en Beleño. Total de kilómetros 48.La ruta un 10, ye una maravilla.