EL EMBARGO

    EL EMBARGO

Señol jues, pasi usté más alanti
     y que entrin tos esos,
     no le dé a usté ansia
     no le dé a usté mieo...

Si venís antiayel a afligila
sos tumbo a la puerta. ¡Pero ya s'ha muerto!

¡Embargal, embargal los avíos,
     que aquí no hay dinero:
lo he gastao en comías pa ella
y en boticas que no le sirvieron;
     y eso que me quea,
porque no me dio tiempo a vendello,
     ya me está sobrando,
     ya me está gediendo!

Embargal esi sacho de pico,
y esas jocis clavás en el techo,
     y esa segureja
     y ese cacho e liendro...

¡Jerramientas, que no quedi una!
    ¿Ya pa qué las quiero?
Si tuviá que ganalo pa ella,
¡cualisquiá me quitaba a mí eso!
Pero ya no quio vel esi sacho,
ni esas jocis clavás en el techo,
     ni esa segureja
     ni ese cacho e liendro...

¡Pero a vel, señol jues: cuidaíto
     si alguno de ésos
es osao de tocali a esa cama
     ondi ella s'ha muerto:
la camita ondi yo la he querío
cuando dambos estábamos güenos;
la camita ondi yo la he cuidiau,
la camita ondi estuvo su cuerpo
     cuatro mesis vivo
     y una nochi muerto!

¡Señol jues: que nenguno sea osao
de tocali a esa cama ni un pelo,
     porque aquí lo jinco
     delanti usté mesmo!
     Lleváisoslo todu,
     todu, menus eso,
     que esas mantas tienin
     suol de su cuerpo...
¡y me güelin, me güelin a ella
     ca ves que las güelo!...


José María Gabriel y Galán



   Extremeñas (1902)    
Recitado por Fernando González

Incluido en Las mil mejores poesías de la lengua castellana. Edición de José Bergua. Clásicos Bergua. Ediciones Ibéricas. Pl. Conde del Valle Suchil, 14. 28015 Madrid. Trigésima primera edición. ISBN 8470830619

Clásicos Bergua
amazon.com

Y en el sitio web Paseo Virtual por Extremadura Página de Manuel Trinidad Martín. Visítelo